بابا وزیر اوغلو
من اوزاق سفره یول آلان گمی
سنی ترك ائدیرهم بیر لیمان كیمی
قورخما آیریلیقدان بوراخ الیمی
سئوگی آیریلیقدان گوجلو دو وآللاه
دونیادا نه قدهر سئوگی وار بیلكی
سن منیم دیلیمین ازلی، ایلكی
قورخما آیریلیقدان اؤلوم دئییل كی
سئوگی آیریلیقدان گوجلو دو وآللاه
سن هله بیلمیرسن آیرییلیق ندیر
هر سفر كؤنلونو سیخیر، اینلهدیر
آیریلان جیسم دیر، روح سنینلهدیر
سئوگی آیریلیقدان گوجلو دو وآللاه
سنسیز حیات دئییل عؤمور گون منه
تك سنسن اورهكدهن یانان سن منه
قورخما آیریلیقدان اینان سن منه
سئوگی آیریلیقدان گوجلو دو وآللاه
قورخو اینتیظار وار آغلار گؤزونده
نئچه یالواریش وار بیرجه سؤزونده
بیر گون بیله جكسن ائله اؤزونده
سئوگی آیریلیقدان گوجلو دو وآللاه
چاغیر قاناد چالیب اوچوب گلهره م
نئچه آیریلیقدان كئچیب گلهره م
اؤلومون الیندهن قاچیب گلهرهم
سئوگی آیریلیقدان گوجلو دو وآللاه
نه فرقی یاخینام یا دا اوزاغام
هلهكی سنینهم نه قدهر ساغام
اؤلسه م او دونیادان قاییداجاغام
سئوگی آیریلیقدان گوجلو دو وآللاه
گؤز یاشی عبث دی چیخیب گئده جهم
كؤنلومو اودلارا یاخیب گئده جهم
من سنه، هامیا ثبوت ائدهجهم
سئوگی آیریلیقدان گوجلو دو وآللاه
تام حقوق لار قورونور.
آرزوبلاق دان گوج آلیب.