آذربايجان موسيقي سي
شعر-موسيقي
+0 سئوديم
یاییلیب : سه شنبه 30 آبان 1391 | یازار : محمد صفائيان | بؤلوم : (Mp3) | 0 نظر

بابا وزير اوغلو

من اوزاق سفره يول آلان گمي

سني ترك ائديره‌م بير ليمان كيمي

قورخما آيريليقدان بوراخ اليمي

سئوگي آيريليقدان گوجلو دو وآللاه

 

دونيادا نه قده‌ر سئوگي وار بيلكي

سن منيم ديليمين ازلي، ايلكي

قورخما آيريليقدان اؤلوم دئييل كي

سئوگي آيريليقدان گوجلو دو وآللاه

 

سن هله بيلميرسن آيرييليق ندير

هر سفر كؤنلونو سيخير،‌ اينله‌دير

آيريلان جيسم دير، روح سنينله‌دير

سئوگي آيريليقدان گوجلو دو وآللاه

 

سنسيز حيات دئييل عؤمور گون منه

تك سن‌سن اوره‌كده‌ن يانان سن منه

قورخما آيريليقدان اينان سن منه

سئوگي آيريليقدان گوجلو دو وآللاه

 

قورخو اينتيظار وار آغلار گؤزونده

نئچه يالواريش وار بيرجه سؤزونده

بير گون بيله جك‌سن ائله اؤزونده

سئوگي آيريليقدان گوجلو دو وآللاه

 

چاغير قاناد چاليب اوچوب گله‌ره م

نئچه آيريليقدان كئچيب گله‌ره م

اؤلومون الينده‌ن قاچيب گله‌ره‌م

سئوگي آيريليقدان گوجلو دو وآللاه

 

نه فرقي ياخينام يا دا اوزاغام

هله‌كي سنينه‌م نه قده‌‌ر ساغام

اؤلسه م او دونيادان قاييداجاغام

سئوگي آيريليقدان گوجلو دو وآللاه

 

گؤز ياشي عبث دي چيخيب گئده جه‌م

كؤنلومو اودلارا ياخيب گئده جه‌م

من سنه، هاميا ثبوت ائده‌جه‌م

سئوگي آيريليقدان گوجلو دو وآللاه


دينله‌يين           ائنديرين


آچار سؤزلر : سئوگی,
یارپاق لار :


Powerd By : ARZUBLOG.COM Theme Designer : Blogskin.ir