توُت آغاجیم، توُت آغاجیم ,
آمان یئریم، گومان یئریم .
خاطیره لر قانادیندا
یاشاتدیغیم پناه یئریم .
توُت آغاجیم، توُت آغاجیم ,
سیرلی سؤزو آنان یئریم .
توُت آغاجیم، اوجالیغیم ,
دئه، آرزوما نئجه چاتیم ؟
دئه كؤكسونه نئچه چارپاز داغ چكمیشه‌م .
نئچه كؤرپه بوداغینی من ازمیشه‌م .
بیرﮔون، شیرین خاطیره لر سوْراغییلا ,
سنی گؤزله‌یه‌جه ییمی بیلمه میشه‌م .
ایندی سنین بوداغیندا ,
بیر ایز قوْیماق موشكول اوْلوب .
ال چاتمایان آرزولار تك
خاطیره لر دؤنمه‌ز اوْلوب .
ایندی یوْخسان، یوخولاردا ,
من گؤردویوم دونیام كیمی ,
ایندی یوْخسان اوْ گؤیلرده ,
ال چاتمایان اولدوز كیمی .