ﻣوسیقیسی: علی‌اكبر تاغی‌یئو
سؤزلر: نبی خزه‌ری
یئنه پاییز گلدی قوْناقلار كیمی،
سولدو محبّتیم یارپاقلار كیمی.
اوره‌ك پیچیلداییر دوْداقلار كیمی،
كولك، نییه بئله اسیرسن، كولك،
نییه اومودومو كسیرسن، كولك.
سئوگیلیم گؤروشه چاغیریب منی،
من نئجه اونودوم اوْلوب كئچه‌نی.
اودئییر آستاجا، سئویرم سنی،
كولك، نییه بئله اسیرسن، كولك،
سن نییه سؤزومو كسیرسن، كولك.
اوْ اوره‌ك آغریتدی، اوره‌ك اینجیتدی،
كؤنلومون سئویملی نغمه‌سی بیتدی.
سانكی محبّتیم خیالدی، گئتدی،
كولك، نییه بئله اسیرسن، كولك،
نییه اومیدیمی كسیرسن كولك.